Heb 8 | ASO | STEP | Gamazi noluvoni' ne'mi monovo ne'mino neingumu' nene gelelesune: Eveneto' medelo mino O'moso inite' lehize-daa' ivete naba ei' monovo've nene ne'mino neive lo lo-lingimuvoni' ma'mine monovo laminekisi minive nene lelikumu' soto' ogo neive. Aza nene O'mosoloti' lemo minive nenako Okulumokuko Guvelesi ve naba minive O'moso'mo gizebo ogo minaa' neine' mo'mosi'veuko nene ana hulaa' ida neive.

Hebrews 8

Lelito' Medelo Mino O'moso Inite' Lehize-daa' Ivete Naba Izesu' Aza Nene O'moso'mo Lo huko-lidine' Gamazi Gosoho' Nene Do Soto' O-ledave. Ido' A'mine Gamazi Ne'mo Gomu' Lo huko Line' Gamazi Nene Ivile' Ogosa Gamazi Lamine' Neingumu' Line' Gamazi

1 Gamazi noluvoni' ne'mi monovo ne'mino neingumu' nene gelelesune: Eveneto' medelo mino O'moso inite' lehize-daa' ivete naba ei' monovo've nene ne'mino neive lo lo-lingimuvoni' ma'mine monovo laminekisi minive nene lelikumu' soto' ogo neive. Aza nene O'mosoloti' lemo minive nenako Okulumokuko Guvelesi ve naba minive O'moso'mo gizebo ogo minaa' neine' mo'mosi'veuko nene ana hulaa' ida neive. 2 Ido' a'mida nene evenelite gizamani' numuno Guvelesi ve'mo do soto' molani' mono' numuno ne'mi avazahalo' seli numuno gele vine' mono' numuno avotemote gizi di monani' ne'mine mono' numuno lulou' gehepeve O'moso'mi mo'mosi've neingu' nene mino inite' O'moso lehize-daa' gono've nene do neive. 3 Ido' ne'mine gono do minaa' neine' nene eveneto' medeli mini O'moso inite' lehizi-daa' ave naba muki' di oti-ngidaa' nani' nene evene' O'moso imilisa di iga' nani' initekisi ido' lihimemu' sipisipi nevo'mine inite' ngibili oloku' gizi imilizave li di iga' nani' initekisi nene O'moso lehizi-dilizave li evene' di oti-ngidaa' nani' nenako nemu' nene azasi ne'mine gono do minaa' neive. Ido' ne'mine gono do neine' nenako nemu' nene azasi nene inite' O'moso ma lehize-delido' o minine' nenako mo nene lehize-dani' ve. 4 Ido' aza nene misubouko mene minidini Mose' gizine' lou' gamazilo' e'meti eveneto' medeli mini O'moso inite' lehizi-daa' ave nene mo minani' nenako aza nene eveneto' medelo mino O'moso inite' lehize-daa' ive lolo' ilido' lisihe' amivo lolo' amidine. 5 Ingine misubouko eveneto' medeli mini O'moso inite' lehizi-daa' aveti mono' numuno'ine ido' gono daa' nani' nene Okulumokuko minani' initeliti avazaha ido' mumuno'inevo' nene minaa' nave. A'mine nene mono' numuno seli numuno gele vine' nene Mose' gizelesa neivo O'moso'mo Mose'ni ti' lo lo-imine' ma'mino nene neive: Gaza nene gololo' minusido' seli numuno gele vine' mono' numuno ido' a'mingu' miniliza inite' muki' neti avazaha gelebizuvoni' malo' nene e'meto ehe' ogo minosa do lamino lolo' ogo gizezo. 6 Ido' eveneto' medeli mini O'moso inite' lehizi-daa' ave ingine gomu' gono daa' ani' nene Okulumokuko gono gihile minine' ne'mi avazahalo' nene daa' ani'za Izesu' nene a'mine gono gihile nene nodavo ne'mo gomu' daa' ani' gono nene ngivile' ogo hozila neive. Ido' gomu' aleve lo huko-ngidine' gamazi neu' nene O'moso'mo inite' lamine' o-ledelesa lo huko-lidine'za leli' lo huko-lidine' gamazi gosohoku' nene ivile' ogosa inite' lamine' goloso o-ledelesa lo huko-lidine' nenako Izesu' aza lelikisi O'mososi kuku holo-ledo gamazi hulo eza ema ogo leli' gele dalone' gamazi ve lo O'moso'mo lo huko-lidine' gamazi lo do ogo limine' ne'mo O'moso'mo gomu' aleve lo huko-ngidine' gamazi nene ivile' ogo neine' nene gele none. Ido' a'mine votigilelo' a'mine'mine ogo Izesu' gono do neine' ne'mo misubouko eveneto' medeli mini O'moso inite' lehizi-daa' avete gono di minaa' ani' nene ivile' ogosa lamine' neive.

7 Avotemote gili dalizani' gamazi ve lo lo huko-ngidine' gamazi ne'mo gono davo vo gihile ma izidiniko a'midoti' nene leli' gili dalizani' gamazi ve lo gosoho' ma do soto' ogo lo huko-ledamidine. 8 Ne'mine amidine'za avotemote igi mili iga' ani' monovo'ine goloso nene do soto' o-ngedosa Guvelesi ve'mo line' gamazi ma mono' godolou' ti' li gizi nizani' ma neive:

Guvelesi ve'mo ti' lo lave:
Gililo. Isilaele' zuhoti muliseukisi Zuda' zuhoti muliseukisi nene
gili dalizani' gamazi gosoho' ma lo huko-ngedo do soto' oloni' gamene nene
alinge' ma soto' oloseive.
9 A'mine gili dalizani' gamazi gosoho' ma lo huko-ngedeloni' nene
avo'ningine Aigita misubouti' ngele'mizo novosa gili dalizave lo
lo huko-ngiduvoni' gamazilo' nene e'metamadi'mo ingine nene
ninge mate-ngedo minuvoni' nenako ne'mo nene gomu'
lo huko-ngiduvoni' gamazi ma'minosa lo huko-ngedamo
atoli'mine ogo lo huko-ngedelesuve lo
10 Guvelesi ve'mo gohi ti' lo line':
Alinge' a'mine noluvoni' gamene nene ogavo neloti'
alinge' nene Isilaele' a'vopilemo' zuho mukilite gili dalizani' gamazi
ato' gohi ma lo huko do soto' o-ngedelesuve.
A'mine lo huko-ngedeloni' gamazi nene ne'mino neive:
Neni' lo huko loloni' gamazi muki' nene engi' ga'ningu' molo-ngedo
lu'ningu' nene luhuvo gizekelesuve. Ne'mine ogo engi' O'moso'ine lolo' ogo nouvo ingine nene
neni' evene'ne zuho lili' igi minilisave.
11 Ne'mine igi evene' dizi minani' limi minani' muki' nene
nenikumu' gili osu' li gili nilizani' nenako ve malite ingine zuho ga'ine di
Guvelesi vemu' gili minilo li ma li-ngidamilisave.
12 Ido' ne'mino lo huko-ngedeloni' nene goloso inite' dangumu' nene
ise'ine ize-ngedosa a'mine lihime'inemu' nene
gohi ga'ne gelamolosuvonako nemu' Isilaele' aleve nene
a'mine luvoni' gamazi nene lo huko-ngedelesuve lo Guvelesi ve'mo line'.
13 Ido' gili dalizani' gamazi nene gosoho' lo huko-ngedelesuve line' nenako ne'mo gomu' lo huko-ngidine' gamazi nene mo litehe iline' ne'mo nene mo geto vo haleke gehepeve ilido' ogave.